短炒開盤地產股
2018/06/04 04:12:51 網誌分類: 經濟
西班牙政局添煩添亂
特朗普六親不認，美國向歐盟、加拿大及墨西哥徵鋼鋁關稅，搞到盟友好氣憤，聲言會採取報復。中環茶友話，特朗普砌中國都仲可以理解，連加拿大同墨西哥都搞，就真係有啲過份。墨西哥經常被美國欺凌，踩佢多兩腳其實無乜意思，特朗普咁做俾人感覺係大美國人主義。更加離譜係加拿大都唔放過，加拿大天然資源豐富，人口只有三千幾萬，基本上石油、木材、淡水全部都被美國用，叻人落去美國打工，有錢人去美國醫病，對美國根本全無威脅，咁樣特朗普都話加拿大人搵佢着數，咁歐洲同大陸俾佢搞，阿Q啲講就真係一啲都唔出奇。
美國搞埋歐洲同加拿大，大陸扮演吓花生友，形容美國係「以鄰為壑」。乜嘢叫做以鄰為壑呢？呢個咁古雅的詞語，係講戰國時代，有個國家築堤治水，但就將本國氾濫的洪水排入鄰國，把鄰居當成洩洪的水泊，意思即係將自己的問題推給旁邊的人，譬如好似自己經濟唔掂，就將本國貨幣大幅貶值，搶走鄰近地區的生意。美國o依家經濟其實唔錯，但唔理三七廿一出招保護本國貿易。大陸見到連其他國家都做埋苦主，順勢跳出來話，好多國家對當前美方搞單邊主義和保護主義感到擔憂。外交部仲話，當前經濟全球化深入發展、各國利益日益交融，美國的做法等同讓子彈亂飛，絕不是有效和有益的方式，絕不具有任何建設性。大陸的形容，其實都講出咗o依家全球市場受到非理性因素影響下的狀況。
特朗普四周點火頭已經搞到股民一頭煙，西班牙首相下台又再添不明朗因素。西班牙本來就有加泰羅尼亞獨立的暗湧，o依家強硬對付獨派的總理因為捲入貪腐醜聞下台，接棒者話會同加泰對話，未來西班牙政局難料。為了保持歐盟穩定同完整，歐盟主要成員都暗中支持西班牙中央政府，孤立加泰獨立勢力，o依家就變咗有啲唔知何去何從。喺如此亂局，加上內地股市下跌，上周五個市幸保不失已算係難得，恒指收報30492，全周未能打破上落市局面，國企指數升41點，衝破12000大關以12020收市。
美股上周五收市則回升，杜瓊斯指數收報24635點，升219點；納斯達克指數收報7554點，升112點；標準普爾500指數收報2734點，升29點。美股造好主要係美國5月份新增非農就業人口達22.3萬人，遠超市場預期，失業率更創下18年新低的3.8%，強勁就業數據推動經濟增長。
永泰今年三盤齊出
龍頭科技股普遍跟漲，蘋果升1.8%，微軟升2%；Netflix升2.4%， Google母公司Alphabet升3.2%：美國原油產量增加，石油輸出國組織（OPEC） 及其盟國可能增產，油價受壓，布蘭特7月期油收報76.71美元，跌0.85%；WTI7月期油收報65.71美元，跌1.98%。就業好帶動美股上升，但美國失業率跌到去百分之3.8%，經濟咁勁同通脹升溫壓力增加，美息易升難跌，對港股未必有利。
股市上上落落，反為樓市就浪比浪高，幾個大型新盤開售，收票情況不俗，個別有盤開的二、三線公司近日冉冉上升，似乎有炒開盤格局。當中之一係冷門股永泰（369）。永泰係三線地產公司，公司質素其實唔錯，但呢個規模公司土地儲備唔大，形成賣樓收益唔係好穩定，去年主要係出售落成項目的單位，加埋租金收入。雖然係咁，由於樓價急升，盈利都已有不俗升幅。今年，公司會推售「澐瀚」、「澐灃」及「TheCarmel」三個新盤，上半年呢啲新盤已開始應市。由於單位係豪宅級數，去貨唔會咁急，但o依家樓市升得咁高，加上地皮係幾年前地價仲係低時買入，利錢會相當豐厚。
永泰一向交投唔活躍，但佢手頭有唔少收租物業，主要喺觀塘，堪稱觀塘大業主之一。去年集團連同資本資略（497）旗下組成財團，奪得中環卑利街/嘉咸街重建項目地盤。當時雖然未有披露中標價，市場消息就傳，中標價約116.2億元，以項目可建樓面面積43.35萬方呎計算，每方呎樓面地價約2.68萬元。呢個地盤位於嘉咸街、結志街和閣麟街交界，屬於整個嘉咸街重建項目之中，唯一一個僅提供非住宅樓面的期數。永泰買咗件靚嘢後，減磅賣番啲非核心物業，加埋幾個新盤開售，相信未來兩年盈利應該唔錯。股價上周就唔受上落市影響，打破多年高位報收6.5元。
平價入地發展商賺到驚
本來，今年落成新樓數量唔少，市場本來估計發展商要爭客。睇番今年政府等緊覓地小組做報告，推地動作好似慢晒，好多發展商回籠資金都未有出路，索性慢慢出貨，結果樓價愈賣愈高，呢樣嘢真係一年前連行內人都估唔到。
有做地產的中環茶友懺悔話，早兩年低價買咗地的樓盤o依家沽出去，點知升咗一個開，真係賺錢賺到佢有啲驚。咁好似永泰呢啲執咗幾個平地盤，本身股價同資產折讓好大的股份，派息有成4厘，呢排炒吓賣貴樓的概念都唔奇，所以都有一定累積升幅，若想跟風短炒可以等佢略回先郁手。
懸賞買樓夠激勵 黃鎮廷奪冠當熱身
香港運動員近年都幾爭氣，不久前乒乓球手黃鎮廷夥拍師弟何鈞勇奪得香港首辦的國際乒聯世界巡迴賽的男雙冠軍。上個月體育學院主席林大輝啱啱懸重賞，話阿廷若在2020年的奧運取得獎牌，肯定就可以置業買樓。跟住阿廷就攞獎，唔通真係想上樓帶來的動力。
林大輝出重賞，佢同茶友講，真係好希望香港攞番面奧運獎牌，俾香港人開心吓。佢數數手指香港距離首個也是唯一一個奧運金牌已有20年，回歸後只有一銀一銅兩個獎項。
以前林大輝搞波，都係以豪爽聞名，20年前佢搞波，一年就使800萬，當時夠買幾層樓。佢o依家一樣鍾意搞波，主要集中搞青訓。另外，佢搞咗個著名本地足球員的展覽，稍後仲會喺麥花臣搞閉幕禮兼名將表演賽。
林大輝懸賞惹起話題，皆因近排樓價不斷創新高，已創出最長升浪。香港樓價咁貴，運動員要買樓一向難，好似本地唯一奧運金牌得主李麗姍，都係贏咗金牌後先有能力買樓。o依家情況相比個時應該難度仲高，最慘係現時公屋上樓輪候時間已超過五年。按照現時建樓速度，幾年後上樓速度隨時要6年。如果想買私樓，市區樓每呎賣三萬元才有「微利」，年輕人縱然月入三萬，不吃不喝每個月只能買一呎樓，要買五百呎單位要超過四十年時間，呢個數仲未計利息。如果計埋生活費，咁就隨時供一世都未供完。
陸羽仁
回應 (0)
我要發表