科技股宜避風頭
2018/06/11 04:12:55 網誌分類: 經濟
臉書谷歌相繼中招
美股上周五先軟後揚，杜瓊斯工業平均指數收市上揚75點，報25316點。標普500指數收市升8點，報2779點；納斯達克綜合指數升10點，報7645點。總結一周，杜指升2.8%，是3個月以來最大單周升幅；標指升1.6%；納指升1.2%。
不過，科網股板塊湧出唔同的壞消息，連續兩日走軟。周末傳出蘋果公司要求供應商下半年削減iPhone組件的供應量，拖累該股份股價曾瀉近2%，收市跌0.9%，惟全周計蘋果仍升0.8%。上周手機設備股曾經跟住科網股炒高，睇嚟本周開市又要留神。
科網股成市場焦點，但勢頭就唔係咁「盞」。繼洩露用戶數據予手機商後，臉書（FB）因程式出錯，令用戶私人帖文變成公開，受影響用戶達1400萬名，股份跌後反彈，收市倒升0.5%。
同一時間，谷歌（Google）亦因與中資合作，勢面臨國會調查，母企Alphabet股價最多挫1%，收市跌0.3%。亞馬遜收跌0.31%；芯片供應商高通亦跌0.63%；IBM收漲0.54%；微軟收漲0.74%；AMD收市升2.42%；美光科技收漲2.95%；Spotify收市升3.28%。
係上周中科技股帶動納指衝上高位，本地科網股都炒咗一浸，但係呢次升浪中，臉書明顯落後，除咗因為早前公司係「通俄門」中招，被揭發私隱被「劍僑分析」濫用外，最近美國國會議員矛頭又指向臉書與中國四大公司分享用戶信息構成對美國國家安全的威脅。《紐約時報》早前刊登報道，披露臉書「洩露數據」，使得公司承受壓力劇增，相信亦係股價受壓的源頭。
隨時燒向中資科網股
對於《紐時》爆料，臉書以一貫的淡化策略回應，聲稱「數據數據不過是儲存在用戶手機上，沒有被不當使用。從過去幾次經驗，臉書對這類危機通常都係「扮無嘢」，但市場人士就唔敢隨便輕信，令到臉書股價落後。臉書主要靠數據和個人資料搵食，呢樣嘢愈來愈發覺屬於敏感生意，加上臉書老闆朱克伯格熱衷於開拓內地市場，會唔會被華盛頓政客視為同中國行得太埋，令呢家公司成為政治敏感股票。
美國佬砌臉書，主要都係針對自己的政治敵人，「通俄門」的敵人就係俄羅斯，華為背後就係中國，呢兩個大國先係特朗普治下要針對的目標，所以除咗華為，其他中國科技股，只要佢哋同美國有接觸，都有被美國整治的風險。美國係科企領域獨領風騷，過去10年將歐洲拋離，而家內地恃着市場龐大，係高新科技領域想「彎道超車」，同美國爭一日之長短，隨之就惹來美國打壓。
順住追殺臉書個勢，國會議員再要求調查谷歌同推特（Twitter）與中資企業的數據分享合作關係，今次除咗華為，連騰訊（700）及盛傳準備係香港上市同發CDR的小米都搞埋。消息一出，騰訊即終止連日彈，上周五單日急挫近3.3%，仲成為大市顯著調整的主因。
今次向谷歌等出手的係美國參議院情報委員會首席民主黨議員沃納（Mark Warner），佢已去信查詢科網公司用戶數據是否被手機或中資企業的伺服器存儲及如何監督。谷歌早前與騰訊同意共用涉及一系列產品及技術的專利，協議有助谷歌在中國展開業務，同時有利騰訊向海外市場擴張，為谷歌與大型中資科企的首度合作。而小米過去就同谷歌合作在印度推出的手機。佢哋情況同臉書有啲相似，就係同中國行埋，結果立即被政客招呼。
低撈博反彈宜買傳統股
從美國幾大科技股都捲入政治浪潮，可見呢次中美角力有啲動真格。對於美國巨企政客都唔客氣，對於中國公司相信佢哋會更加棘手。中環茶友捉路，內地科企本來想透過來香港上市以及發行CDR籌集子彈壯大業務，唔知美國佬係咪見到呢個情勢，兼且上市又無乜好嘢益到佢，所以加快手腳封殺。而家美國政客殺氣騰騰，係美國掛牌的中資科網股都咪話唔腦交戰。
無論美國抑或本地科網股，而家都沾到啲政治敏感色彩，短期會較為波動，好似騰訊係恒指屬權重股，若然股價不振，對個市都會有拖累。與此同時，美國係月中就會議息，要留意市況會唔會受到息口向上的壓力。牌面睇，美國無論就業同增長數據都強勁，加息機會高唱入雲，市場關注點係今年加息幅度會否增加。上個星期四大市反彈，陸羽仁認為唔易爆上大幅超越31600點，如果高位有食胡，咁就可以等機會再低吸。不過，就算係買可能都係買番啲有息派同內需呢類傳統股，炒作科技股就要小心。
糖王蠔油配龍躉塊夠惹味
美國貿易戰打到嚟，但暫時似乎未影響消費。最近中環茶友有位相熟經理過檔尖沙咀喜來登中菜的天寶閣，叫佢去捧場，去到發覺都幾旺場。
茶友話，該店新任總厨陳偉傑（JACK），來自HOTEL ICON的天外天（Above Beyond），該店出產不少名厨。當日佢試咗幾款新菜。當中有味麥香龍蝦球，曾經在新加坡名店食過麥皮蝦，呢次改用本地龍蝦，肉質更正。另一款夏日菜式係話梅玉桂骨，吃肉排前可以先嚐伴碟的黃酒浸話梅，甜甜酸酸相當惹味。
當日茶友還獲酒店高層私人醒咗樽日本蠔油，用來配龍躉塊。呢樽蠔油聽講甚有來頭，乃係糖王郭鶴年至愛。據講糖王一向鍾情食蠔油，試過呢隻日本產品後，覺得夠味又唔鹹，所以經常入貨。高層託人係日本高島屋買返嚟，見茶友係知音人，於是整碟佢歎。茶友夾件魚肉，點小小食之，可能係心理作用，真係覺得鮮冶美味，好似畫龍點埋睛。
陸羽仁
回應 (0)
我要發表