外資唔食小米
2018/06/25 04:12:45 網誌分類: 經濟
美國掛牌中資股有壓力
中港股市俾特朗普玩殘，反而美股無乜事。華爾街呢排由新經濟代表納指威晒，屢創新高，舊經濟股為主的杜指連跌7日，到上星期石油輸出國組織達成有利油價協議，能源類股帶動杜指升119點，24580.89點，扭轉連續八個交易日下跌，整周跌2.0%。標普500指數收升5.12點，報2754.88點，全周累跌0.9%。納斯達克綜合指數收跌20.13點，全周微跌0.7%。石油輸出國組織 （OPEC）閉門會議剛剛結束，公報草案並未提出明確增產數字，僅提及重返100%減產執行率。但多方消息來看，油組已達成名義增產100萬桶/日的協議，但實際產出增幅大致在70萬桶/日。美國能源類股在OPEC決定增產之後大升，埃克森美孚、雪佛龍收升2%。
值得一提係《環球時報》話中國可能狙擊美國成份股，但大陸未出手，部份美國掛牌中國股份大跌，愛奇藝急插6.5%，虎牙收跌5.7%，百度收跌0.58%，阿里巴巴收跌0.1%。睇到股市形勢唔靚仔。
大陸股市近日因為貿戰表現疲弱。彭博引述知情人士表示，內地監管部門本周對券商進行窗口指導，要求券商在大額股權質押平倉前，需經監管部申請批准，經部門同意後才能賣出，不能強行平倉，可見中央A股破底都不敢坐視。
人行急急腳降準
人民銀行急急係周日宣佈降低銀行存款準備金率0.5% ，放水共7000億元人民幣救市。
人行自2018年7月5日起，下調工行、農行、中行、建行、交行五家國有大型商業銀行和中信銀行、光大銀行等十二家股份制商業銀行人民幣存款準備金率0.5個百分點，可釋放資金約5000億元，用於支持「債轉股」項目，同時撬動相同規模的社會資金參與。
第二是同時下調郵政儲蓄銀行、城市商業銀行、非縣域農村商業銀行、外資銀行人民幣存款準備金率0.5個百分點，可釋放資金約2000億元，主要用於支持相關銀行發放小微企業貸款，進一步緩解小微企業融資難融資貴的問題。
係呢個市況下，本港首隻同股不同權股份小米（1810）上周六開咗記者會，宣佈呢個星期登場招股。
基投以中資為主
以招股價計算，以招股價17至22元計算，一手200股入場費約4444元。小米今年預測的市盈率約在40倍至51倍之間，訂價被指比大部份國際大型科網股為貴。以招股價計算，估值僅次於美國科網龍頭之一的阿馬遜的八十三倍，如果同蘋果的十六倍，更加係貴好多。小米近年積極拓展智能電器，公司認為自己與韓國品牌三星比較，現時市盈率較三星的貴最少5倍。當然，亦有券商預測今明兩年會有高增長，與蘋果或三星業務已經成熟不能直接比較。
小米傳出來港初期聲勢洶洶，陸羽仁當時就話佢上市有三座大山要跨過，而家佢正式招股，算係跨過咗大山，但估值就比原先傳出近千億美元少咗一截。至於好唔好認購，陸羽仁覺得如果對科網股有興趣，認啲都無所謂，但如果借孖展就唔太適宜。從宏觀因素睇，中美貿易戰峰迴路轉，結果唔易估，借錢買股風險唔細。
微觀啲睇，小米招股安排有兩樣嘢要留意。從銷售文件披露，小米共引入七名基礎投資者，合共認購約5.48億美元（約43億港元）股份，按認購金額規模排名，最大的是CICFH Entertainment（中投中財娛樂），其次是中國移動和高通，之後是國家開發銀行的私募基金認購五點一八億港元；其餘包括保利集團、順豐，以及招商局集團。從基礎投資者陣營睇，除咗高通可能同佢有生意往來捧吓場，無乜大型外資基金參與。美國科網股炒到天價，但佢哋對小米似乎無乜興趣，咁變成有點塘水滾塘魚的味道，咁樣你可以話貨源集中啲，但就有啲靠中資撐場的味道。
另一樣係招股前，小米決定擱置同時在內地發行CDR（中國預託證劵）的計劃。本來小米在香港上市有點唔係咁熱的感覺，反而CDR好似有機會帶起番氣氛，後來取消計劃，就引起咗市場揣測，有說法就拉上了中證監上周評論新經濟股估值過高有關。究竟呢個有幾真？陸羽仁覺得有點空穴來風。內地通過咗CDR計劃，有幾十間公司等緊上市，當中估值最高是近萬億元人民幣的螞蟻金服。
集資額大叫價唔可以貴
陸羽仁早前去深圳睇過其中一家好有機會發CDR的創科公司，公司6年前創立，當時未有產品，憑計劃暫就集咗4000萬元人民幣，經過幾年時間發展，原先的科技產品生產咗出嚟，公司經過幾輪融資成功籌集成百億起廠準備量產，但就未點做過生意，呢間公司市值估值超過300億元，公司自己更話身價有50億美元，身價超過400億人民幣。由於陸羽仁唔係科技專家，雖然公司產品概念好好，市場好大，但實際唔知有幾大競爭力，只能話呢個估值比起資產高幾倍真係好有藝術性。
大陸推出咗CDR，當然希望佢有排玩，唔想俾公司用高估值吸乾晒啲水，所以聽到小米唔想CDR，都有啲明白發生乜事。經過一輪周折，而家小米準備登場，個價應該都無先前叫得咁貴，但佢集資額咁大，掛牌後好難大升，所以就算認購都係適宜小注宜情，無謂冒住風雨去博大霧。
莎莎績佳 馬時亨不急離場
莎莎國際（178）上個星期公佈年度業績，純利升34.7%至4.4億元，每股末期息11仙，同時仲慶祝成立40周年派特別息3仙。莎莎業績報佳音，相信其中一個最開心者，就係近日忙於解話的港鐵主席馬時亨。
事緣2015年港股經歷大時代，馬時亨與傳媒閒談起市況，透露在三、四元水平買入莎莎。其後，恒指急回，莎莎股價在零售低潮下仲插到去最低的二元二角，有記者記者當面就指他睇錯市，搞到佢馬上連續講「我錯囉，我咪錯，我錯」。雖然口頭認錯，但佢明言自己會溝淡，理由是看好管理層夠進取，若肯中長線持有，斷不會虧損。結果，這個月莎莎股價升上六元五角，比低位翻了兩番，比他最初買入價也高出五、六成。
呢次莎莎好業績兼派埋特別息。公司近年又積極進軍電商業務，主席及行政總裁郭少明問及未來部署，仲以世界盃作比喻，「去年守、今年攻」，去年整合倉庫營運及配送渠道，長遠有助降低營運成本，未來以爭取更多容戶為首要策略，有信心電商業務持續改善，作風果然夠進取。聽聞馬時亨手頭的股份賺錢雖然賺咗唔少，但佢都無諗住咁快清貨離場。
陸羽仁
回應 (0)
我要發表