特朗普一個打十個
2018/07/09 05:12:59 網誌分類: 經濟
貿戰衝擊 美股免疫
同港股相比，美股表現始終好啲，上周五美國科技股表現亮麗，納斯達克指數跑贏，收報7688點，升101點；facebook股價首次突破200美元，創收市新高，助納指升超過1% ，標準普爾500指數收報2759點，升23點，升幅百分之0.85。一周累計，杜指彈升0.8%，標指上揚1.5%，納指更抽高2.4%，完全不受貿易戰影響。
美國經濟表現持續強勁，6月增加21.3萬職位，高於預期的19.5萬，失業率升到4%，市場人士本預期保持在3.8%的49年低位，顯示美國6月就業增速強勁，但平均時薪按年增長2.7%，略低於預期。工資增長溫和，聯儲局今年內再加息兩次必要性降低，美元顯著下跌，美匯指數尾段挫0.41%報94.01。歐羅升0.45%報1.1746美元。正如早前講，美國經濟愈好，打貿易戰的本錢愈多，大陸都唔容易有安樂茶飯食。
美國總統特朗普打貿易戰，目標包括歐洲盟國、美洲鄰居同埋中國大陸，搞到天怒人怨，但市場最誠實，美國左右開弓，但美元美股完全無受影響。以往亂世買黃金，但呢陣全球貿易環境立立亂，金價卻聞風不動，反映聰明資金寧願走去買美元資產，咁即係話到o依家為止，市場仲係相信美國成為贏家的機會大。
特朗普狂傲無禮，喺國際上神憎鬼厭，早前德國總理默克爾在社媒擺咗張相，係德法加等國領袖「睥」特朗普，一張相反映出各國對佢驕橫態度有幾不滿。喺中美兩個徵收關稅正式展開後，有說法大陸會同歐洲加強聯繫，共同對應美國的單邊貿易主義。不過，中環茶友普遍睇淡中歐以至其他國家聯手對敵的可能性，皆因美歐傳統上有盟友關係，在政治意識形態接近。o依家美國四圍點起火頭，唔同陣營或者可以行得近啲，但當美國調整策略，拉一個打一個，咁就好難相信歐洲會真誠合作。
不利賂者以賂者喪
戰國時期，秦國一個對六個，六國信咗蘇秦搞合縱，秦國就搞連橫去逐個分化，結果成功消滅各國。後代的蘇洵寫咗篇六國論，結論係「六國破滅，非兵不利、戰不善，弊在賂秦，賂秦而力弱」，而且「不賂者以賂者喪」。意思係六國點解被秦國逐一吞併呢？就係因為各國買秦國怕，買秦國怕搞到國力慢慢衰弱，最終被人食咗。
六國中有些國家唔肯買秦國怕，但因為有人買怕令秦國不斷壯大，終於令唔肯買怕的國家都無法和秦國對抗。美國o依家國力遠超任何單一國家，而且經濟實力排第二的中國妖魔化咁多年，令到其他國家唔存在共同合作對抗佢的堅實基礎，呢個亦係美國夠膽一個打十個的理由。o依家中國拉攏歐洲，如果美國要拉一個、打一個，大陸成為拉攏對象的機會有幾高，大家心中有數。
茶友話，中美要搞番掂，大陸必須要讓步，呢點其實北京心中有數，關鍵係美國而家真正目標唔係要降低貿易赤字咁簡單，o依係要中國放棄發展高科技，咁等如自絕後代，咁辣的條件大陸實在無法接受，所以先至被迫對美國硬撼。佢話，o依家大市短期無得睇，其中一個可能性係貿易戰繼續打落去，個市慢慢習慣咗新的貿易環境，若然出現這個狀況，後市就唔可以過份樂觀。當然，佢亦唔可以排除特朗普一日瞓醒忽然退兵的可能性，但呢個機會暫時發生機會唔係咁高，所以呢個時候買股要用閒錢，同埋要做長線準備。
美元港元都要留意
貿易戰除咗影響公司盈利，仲要留意兩個影響。一個係美元匯價，若然資金繼續避入美元，美匯呈強，對香港就唔係咁好。呢排人民幣走弱，其實同時係反映咗歐羅軟咗。港元跟住美元強，對香港的出口都會有影響，o依家香港的出口，唔單單係工業產品，仲包括服務出口，好似旅遊、零售。去年起，旅遊、零售業復甦，除咗因為社會穩定咗，同匯價關係都好大，所以呢排美元強，旅遊關連的公司好似莎莎（178）喺宣佈靚靚業績後，由高位5.7元插咗兩成去到4.53元。莎莎業績由低位回升，本來增長有餘未盡，股價就算好消息出貨，都唔應該回調咁多，佢深度調整都係反映大家對旅遊零售業可能受強美元的影響。
另一個要留意係港元表現，早排港元一度轉弱，之後金管局接港元沽美元，匯價轉趨穩定，當中一個因素係有大型新股集資。上個星期小米集資完成，市場反應平平，跟住大型新股集資活動唔知會唔會受影響，若然大戶將香港當係提款機，咁匯價都有機會再受壓，對股市氣氛都會不利。本來港交所（388）預咗今年好多大公司上市有胡食，但o依家大氣候唔就，連沙特阿美都傳出有可能擱置上市，可見全球投資市場都受特朗普效應干擾，進入好不穩定的狀態。
毛記講前景 玩殘小股東
上星期好多股份都見一年低位，令到掛牌後創出新低的毛記葵涌（1716）唔係咁惹眼。毛記招股時搞到間接持有佢股份的華文媒體（685）都喪炒，結果躋身認購王，但正如股神巴菲特所講，當大浪過後就知邊個無着褲。
毛記早前公佈業績，盈利跌至不足七百萬，基本上無乜邊瓣業務有表現，而管理層係業績展望時，繼續其一貫博懵扮佛系的表色，好似佢話「本集團與香港網上廣告行業的其他跨國媒體服務參與者，以及大量中小型公司就品牌知名度、服務質素、銷售及市場推廣效率、設計及內容的創造性、價格、與客戶及供應商的策略關係以及人才挽留等進行競爭。」連標點接近九十個字，睇完根本唔知佢講乜，總之前景就一片迷濛。小股東如果認真啲睇吓業績報告決定買定沽，就真係好易玩殘。
毛記掛牌最高成過11.76元，大戶係高位紛紛減持，上周跌到1.71元，雖然跌幅已經超過八成，但市盈率仍然達到50倍，市值有4億幾，雖然股份已經跌到去個殼階段，但o依家港交所想收緊賣殼，加上唔知會唔會玩供股抽水，所以呢個都未必係安全水平。
陸羽仁
回應 (0)
我要發表