樓市等天收
2018/07/16 04:12:56 網誌分類: 經濟
上星期係貿戰膠着下，恒指收報28525，以全周計累積上漲209點；國企指數收報10746，累積上揚123點。上周大市焦點之一係半新股小米集團（1810），該股周一上市潛水，失守17元招股價，之後跟隨外圍科技股造好。在公佈於周五收市後將納入富時指數後，股價受投資者追捧，升破20元大關，高見21.8元，收升11.37%報21.45元較上市價17元累升26%。
上海和深圳交易所假期發出通告，表示暫時不會把同股不同權公司、外國公司和合訂證券三類證券納入港股通股票範圍，意味剛被納入恒生綜合指數的小米（1810）將無緣北水。
美股就繼續強勢，三大指數續升，杜指更突破25000點，創5個月新高，美國聯儲局稱財政政策支持美國2018年經濟增長，科技股續創新高。
杜指收升94點，報25019點，一周累升2.3%。納斯達克綜合指數收升2點，報7825點，連續兩個交易日創收市紀錄新高，一周累升1.79%。納斯達克100指數收升0.13%，報7375點，同樣連續兩天創收市紀錄新高，周內累升約2.34%。
美聯儲半年度貨幣政策報告，重申經濟向好支持漸進加息，財政政策可能會在2018年支持GDP增速。此外，消息指美國政府正積極考慮動用戰略原油儲備，紓緩中期選舉前汽油價格飆升的壓力。美國經濟強勁，息口可能上調，對港股反而未必係好事。
限購有幾大機會實行？
同股市相比，樓價就硬淨好多。政府推出房策六招，但樓價繼續創新高，搞到特首林鄭月娥喺立法會被議員狂質，會唔會設限購令時，都唔敢斷然拒絕。有中環茶友話，今次政府出六招「軟瀨瀨」，特首仲講明唔係想打低樓價，結果二手樓市繼續癲，O依家佢話唔排除設限購令，你估又有幾大機會實行呢？
政府推出房策六招，有個精研政策的中環茶友竟係高位入咗市。佢坦言等政府增加供應，都唔知等到幾時，所以決定郁手。六招公佈後，佢哋都話無後悔買樓。有個入咗市的朋友話，政府推出樓市六招，但重點唔係放係一手樓空置稅，而係等放係增加居屋供應，同埋降低居屋售價。本來一手樓空置稅目標，係趁未來一、兩年樓宇落成增長，谷發展商賣樓，唔好囤積，期望透過短期增加住宅供應，紓緩一下樓市熱度，但O依家政府一邊開徵新稅，一邊抽起咗九幅地成萬個單位，等同令未來供應高峰期洩洪。而且，空置稅實施差唔多要等一年，發展商明知未來住宅供應回落番，O依家先賣啲落成單位，新盤喺攞入伙紙同售樓紙時拖慢啲，咁仲使唔使驚空置稅呢？根據樓市六招，未來房策變咗大抽獎，政府會用多啲地起居屋，好彩合資格又抽到的市民就可以買平樓，但如果土地供應無相應增加，咁用來起私樓的土地就會減少，所以對樓市其實係好消息。
樓市六招出咗後，樓價紋風不動，甚至有啲陰陰哋向上，呢個時候特首唔再等覓地小組個報告，強調會填海。茶友話，覓地小組O依家同特首有啲公然不咬弦。未來佢會繼續做報告，提出各項結論，至於特首就搶閘講咗要填海，結果就係小組個報告無咗權威性同公信力，特首填海又被人話假諮詢，失去咗道德高地，覓地小組報告最後就變成添煩添亂。
政府乏意志同海豚爭地
O依家政府最講民望，係咁狀況下去填海，即係同中華白海豚爭地盤，你話政府有幾強意志去堅持呢？填海本來就已經唔係三幾年就可以起到樓的事，做得成都要幾年先至增加到供應，更何況未來好有機會又係拖拖拉拉，所以佢對增加供應真係唔樂觀。
茶友買得樓，當然係覺得樓市短期下跌機會唔大，視點當然係從樓市向好的角度分析。無可否認，從房策來說，六招降溫效果好有限，否則唔使再話不排除限購。不過，要留意係樓市唔係只受房策影響，更加重要係經濟同利率環境。資產價格受天時、地利、人和影響，O依家睇落樓市要跌，唔係因為政府的政策，而係大環境改變，天時變得不利，咁就想唔跌都唔得。O依家中美貿易戰陰晴不定，若然內地經濟受到貿戰好大衝擊，好大機會影響到本地物業市場的需求。同一時間，要留意美國經濟表現繼續強勁，新公佈最近一周的首次申領失業救濟人數下跌至21.4萬人，而美國消費者物價指數升速創了6年以來最快，如果美國持續加息，利率變天，咁樓價就可能會逐漸感受到壓力。
今年生意好 老闆睇波心情靚
今年世界盃決賽由格仔兵團克羅地亞同法國對壘，呢個戲碼都算有新意。屆屆世界盃期間，都對零售生意有啲影響，好多大老闆索性飛去俄國睇波，又或者約埋一班老友睇決賽。
好似太子珠寶老闆鄧鉅明，佢就搵咗一班本地球壇名宿，再約埋商界老友，喺五星級酒店一齊睇波，大家一邊享受美食、一邊欣賞足球，確係其樂無窮。聽鄧老闆講，世界盃開波後，生意真係靜咗，好彩喺第一季生意唔錯，而且租金又平咗，所以世界盃期間生意少啲可以當係充電休息。
蒙牛股價先受惠
鍾意睇波的大老閣據聞係銀河副主席呂耀東。世界盃期間，澳門博彩業都慢咗落嚟，所以銀河股價跟隨大市調整。今個星期，世界盃曲終人散，加上暑期到來，唞咗一輪睇波的股民應該又係時候出動。世界盃贊助商之一蒙牛乳業（2319）獲瑞信調高全年盈測，蒙牛上周五單日就升5%收報26.7元，突破10天線。瑞信預計蒙牛上半年淨利潤增長62%，收入增16%。鑑於中期業績強勁，該行將蒙牛全年盈利預測上調4%，目標價維持35元。
另一位鐘錶界老闆楊受成就直飛俄羅斯現場欣賞，佢仲撞到阿里巴巴集團主席馬雲。馬雲幾年前入股咗內地聯賽勁旅廣州恒大，當時有人估會唔會係因為領導人係球迷，所以馬雲投其所好，但睇佢係俄國現身湊熱鬧，佢自己都應該係球迷。
陸羽仁
回應 (0)
我要發表