趁鋼錶熱短炒
2018/07/30 04:13:01 網誌分類: 經濟
facebook插完輪到Twitter
上周大市主導因素之一，係阿爺大放水，喺中央貫水浮球政策下，中港股市連彈幾日，但同期人民幣匯價就持續受壓，上周末人仔盤中曾失守6.83關，搞到港股受壓，恒指最後收報28804；國企指數升26點，收報11047點，成交654億元。
另一個大市注目因素係美國科網大股facebook一度因為前景評估轉淡被狂沽。近日遭多間大行下調目標價且預料次季遊戲收入放緩的騰訊（700）周內都曾試穿370元關，低見369.8元，終於喘定於370元以上收市，報373元。
facebook因為預告增長放緩，上周三一度急挫近兩成，搞到科網股有啲風聲鶴唳，去到周五收市，美股周五全線下跌，Twitter唔係咁靚仔的，插水20%，科技股急跌，三大指數當日全面下跌。標指收報2818點，全周累升0.61%。杜瓊斯工業平均指數報25451，一周累升1.57%。最弱係納斯達克綜合指數，收報7737，周內累跌1.06%。
繼facebook公佈業績後急挫，Twitter財報發佈後重演暴跌場面，收跌21%，科技股英特爾收跌8.6%，特斯拉收跌3%，谷歌母公司Alphabet收跌2.5%，蘋果收跌1.7%，facebook有啲驚魂未定，周五收跌0.8%，周內累跌16.7%。facebook預先披露增長會放緩，主要係因應私隱洩漏事件增聘咗人手，我覺得呢個係創辦人朱克伯格的苦肉計，以示自己盡力補救。
美國增長勁利好銀行股
今年朱仔有啲流年運滯，呢排有股東發起集體訴訟，搵咗律師行呼籲在星期四的暴跌中，損失超過10萬美元的投資者加入。代表律師指出，facebook及有關負責人，在4月26日至7月25日期間，作出一系列虛假及誤導性陳述，未能向投資者披露有關公司業務、營運及前景的重大不利事實，包括未有披露每日、和每月活躍用戶數量正在減少 ； 以及未有披露預計收入增長將放緩，利潤率將會下跌。質疑相關令投資者在這段期間，以人為抬高的價格購買公司股票， 並在被告披露有關訊息後遭受重大投資損失。美國係訴訟國家，動輒就有律師鼓動官司，呢個亦喺好多外國公司唔敢係美國上市的原因。
同一時間，有報道指資產管理公司Trillium Asset Management已起草計劃書，尋求革除朱克伯格兼任主席的職務，指一人身兼兩職令他在董事會及公司議程中影響過大，並削弱董事會對管理層的監督，若分開兩個職位，就能解決以上的影響。
基金亦質疑公司在劍橋分析（Cambridge Analytica）等醜聞上處理不當Trillium持有價值高達1100萬美元facebook股份。朱克伯格去年亦曾面臨革除兼任主席的職務，有51%獨立投資者支持此項方案，但方案最後被否決，主因朱克伯格擁有逾75% facebook B股，B股的投票權力為A股的十倍，基金唔係咁易郁到佢，但外界壓力亦令到朱克伯格要諗計應付。
美國科網股呢排受壓，但傳統股份好似銀行股就受經濟向好推動。美國最新數據顯示，次季年率化經濟增長率（GDP）達到4.1%，接近市場預期的4.2%，是大蕭條以來第三快的增速。美國商務部解釋，次季增長主要受到消費者和商業開支帶動，同時出口增加和政府開支亦有貢獻。消費者開支在首季大幅回落後，次季按年增長達4%。政府開支方面，不論在聯邦或州政府層面均在加速增長。美國總統特朗普喺鋼鐵廠演講，就興奮談到美國次季年率化GDP，聲稱有人甚至預期增長幅度可達5.3%，佢個人認為應該唔會咁勁。仲話如果達到4字頭就開心。如果有3.7%以上都可以。增長率公佈後，特朗普在白宮會見傳媒時說，第二季數字「非常非常可持續」，仲話下季的數字將會很出色。
對於美國增長係咪可以維持，有政經猛人就認為要睇過，佢話第二季增長持續，部份原因係好多公司喺貿易徵稅前加快進口，呢個狀況或者第三季都仲維持，但再耐啲就難講。美國增長數字利好，相信對銀行股繼續有利，上周發威的恒生（011）、以至滙控（005）或者會跟炒。
人仔匯價受壓，本地零售好似鐘錶都可能受到影響。上星期，英皇鐘錶珠寶（887）發盈喜，預期上半年盈利按年大增約3倍，公司去年同期盈利3911.7萬元，今年應該賺超過億元。公司表示，增長主要受惠於期內消費氣氛上揚，使銷情理想及毛利率表現穩健，以及營運效率提升。
上半年鐘錶業生意咁好，究竟榮景係咪可以持續呢？與鐘錶業大佬傾起，佢坦言都有啲擔心人仔匯價轉強影響，自從六月份世界盃開鑼，生意少咗約一成，打完波之後，生意都仲未恢復得晒，只係暫時仲未睇得清楚係咪美元強影響。不過，零售業而家有利因素，係租金成本仲係下降中，好多續租的舖位租金都仲係下調，減低咗經營風險。
八月份或有利好消息
鐘錶業大佬話，今年鐘錶業有個特別有利因素的因素，就係鋼錶掀起炒風，按市價基本上係買唔到，想要除咗排隊之外，仲要額外畀溢價，所以能夠攞到當炒鋼錶的錶行，利潤特別豐厚。另外，市場近期傳有個別名牌八月份會調整價格，適應番全球銷售，理論上咁對香港代理生意會有好處，所以如果無好突發的重大不利因素，表行下半年應該都仲有得做。
按照大佬的分析，再睇番鐘錶股走勢，佢哋基本上都升咗唔少，部份已經翻倍有多。如果計埋佢哋盈利增長因素，預測市盈率約為10倍左右，以零售股而言唔算貴，但因為近年業務較為波動影響咗估值，所以策略都係適宜係佢哋公佈業績前短炒。
七哥自傳 名人客仔捧讀
名人近年興起出自傳，像做廚做到上山頂的家全七福創辦人徐維均，最近就出咗本《鹹酸苦辣甜——七哥自傳》。中環茶友唔少都去過福臨門，近年又去過家全七福，都想知佢背後故事，所以都有買超嚟睇吓。
人稱七哥的徐維均父親是福臨門創辦人徐福全，專做富豪有錢人的上門到會，徐維均跟隨父親學師，為有錢人煮菜，後來福臨門經營飯店有成，七哥又奉父親之命，到日本開拓分店，當時除了考驗廚藝外，還要學習如何營運生意。
近年兩家富豪飯堂鏞記同福臨門都有繼承問題。最後福臨門以暗標競投解決，股權以價高者得的方式決定經營者，結果由五哥以高價奪得，七哥賣出股權後本可安享晚年，但他堅持再創業，創辦家全七福，呢種做法好過打官司益律師。
事業有成 揚名立萬
呢次七哥出呢本《鹹酸苦辣甜——七哥自傳》，睇過的茶友話收錄咗唔少軼事，有啲有餘未盡，唔知七哥遲啲會唔會添食。
茶友話，香港名人猛人不少，尤其商界精英同富豪之多，應該數一數二，佢哋一生打拼，應該有唔少故事。人生在世，最重要係留名後世，如果事業有成，在一方有頭有臉，出番本書揚名立萬，搞得轟轟烈烈，威威水水，先至真正對得起自己。
陸羽仁
回應 (0)
我要發表