高估值板塊逐個碌低
2018/08/06 04:12:57 網誌分類: 經濟
港股創出今年新低，美股則繼續強勢，杜指周中調整後，周末無懼貿戰造好。蘋果公司市值突破一萬億美元後，續創歷史新高，曾創新高見208.74美元，收報207.99美元，升0.29%。標指上揚0.46%，報2,840點。科技股反覆靠穩，納指高收。本周累計杜指持平，標指上揚0.8%，納指則升1%。
阿爺夾高人仔外圍反彈
周末值得留意的另一個消息係人民銀行公佈，今日起遠期售匯業務外匯風險準備金率，將由0%調整至20%。此舉被視為防止有人沽空人仔，由於人民幣兌外匯投資成本增加，「出招」消息令主要外匯匯價即時有波動；人民幣離岸價（CNH）急彈500點子至6.8323水平，相等於每百港元兌約人民幣87元。從中國呢個動作，反映中央無意任由人仔自由墜落，咁亦會避免咗進一步引起美國猜忌同指責。消息後隨咗人仔匯價急彈，港股係外圍都回升。從中央夾實仔，反映阿爺唔想金融市場有單向的大幅波動，一有異動就出招維穩。
上個星期港股出現水乾現象，大市好多日交投都係1000億元樓下，只有周六大跌六百幾點可以突破呢個關口。資金不足下，大市出現輪流跌現象，當中最傷係率先回落的科技股板塊。股王騰訊（700）連跌咗六日，上周五叫做回穩，中止六連挫，暫時仲未能收復350元關口，當日收漲1.4%報349.8元，全個星期累跌6%。騰訊反彈相信同外圍科技股造好有關。蘋果公佈靚仔業績，市值突破咗一萬億美元，創造咗歷史。
美國科網股早前回調，一個原因係話佢哋增長未達預期，咁講只係話佢哋估值高，呢樣嘢其實無乜標準，同市場氣氛關係多啲，美國龍頭科網股質素優良，基本上係可見將來都仲有好大優勢，佢哋跌原因只有一個，就係市盈率太高。同一個標準放係蘋果之上，佢雖然市值咁高，但市盈率唔喺咁O依家市盈率係18倍，而且有成1.4厘派息，所以雖然佢有佢的問題，但高估值呢個擔心唔發生喺佢身上，所以能夠率先反彈。
蘋果強勢益唔到手機股
按照呢個邏輯，蘋果的強勢未必可以用喺騰訊又或者其他手機製造股之上。早半年前陸羽仁已經講過，無理由幫蘋果做手機的公司，估值貴得過蘋果，睇番呢段期間，蘋果股價升，香港手機設備股股價就跌，雖然係咁，但到O依家都仲未糾正晒呢種估值的扭曲。至於騰訊同蘋果係股價上的關係更疏離，騰訊股價跟facebook、亞馬遜呢啲增長股相似之餘仲要弱勢啲。過去騰訊大幅調整咗咁多，部份散戶小股東已經去到唔想離場的心情，咁會減低咗沽售壓力，所以未來佢股價要睇仲有無基金狠心出貨，同埋外圍的網企股價表現。
打貿戰波及美資濠賭股
科技股係調整得最快最深的板塊，上周陸續碌低的仲有濠賭股同醫藥股沽壓顯著。7月份開始捱沽的賭業股，上周五仍然嚴重受壓，澳博（880）單日再挫4.7%收造8.88元；次季多賺56%但季績仍遜預期永利澳門（1128）亦跌3.6%收報20元；銀河娛樂（027）、金沙中國（1928）繼續下滑。濠賭股係7月跌市表現唔錯，8月基金經理瞓醒發覺呢瓣仲可以食胡，於是齊齊郁手。濠賭股同樣係估值高的股份，市場對中美貿易戰憂慮加深，若然內地經濟唔掂，照計阿爺必然會減少國民博彩的支出，何況O依家澳門的博企有兩間大公司都係美資，更加無理由我俾美國打壓，仲繼續送錢畀美資博企啫。O依家澳門無論政府同博企都大把水，就算犧牲吓都頂得順，按照呢個邏輯，投資者驚中美打交影響濠賭股，又都幾合邏輯。
至於最新一個板塊受到衝擊就係藥企。藥企周前已受假疫苗案打咗一槌。上周五藥股再發病，上市三日的歌禮製藥（1672），單日急挫16%收報10.2元，較上市價14元下瀉28.4%。歌禮係未賺錢先上市的概念股，係O依家炒作概念唔受落下急插，對呢個板塊氣氛都幾有影響。係一竹篙打一船人下，二線本地薑李氏大藥廠（950）同日插咗12%；石四藥集團（2005）大跌8%。石藥（1093）收跌4%報19.66元，為跌幅最大藍籌股，大價股藥明生物（2269）降4%收報73.7元，以佢一度有望成為紅底股，累插幅都相當勁。
上個星期粗粗哋至少有三個大板塊輪流遭殃，共同點係呢啲公司以盈利推動股價，而且估值偏高。呢啲股價係榮景時的恩物、逆境時的毒藥。當經濟好、信心高時，投資者對睇唔清、有聯想的公司最有興趣，貪佢有無限空間，但當信心不足時，資金迴避風險，咁呢啲股份就會遭殃。通常，呢啲股份係跌浪中最經受唔起考驗，到呢啲股份跌完，輪到連比較實在的股價都被人沽埋，咁個市先至實淨啲。
陸羽仁
回應 (0)
我要發表