民粹式貨幣風暴
2018/08/13 04:13:00 網誌分類: 經濟
土耳其里拉急跌波及歐羅
上星期港股係反彈周，恒生指數全周累升690點，直至周五才出現回吐，恒指低見28296，最終仍企穩10天線（28244）及20天線（28347）樓上，收報28366，國指收報10943。港股上周結束反彈，主要係土耳其里拉匯價再創新低，投資者憂慮引發新興市場金融危機，墨西哥比索下跌1.5%，巴西雷亞爾匯率下跌1.7%，南非蘭特匯率下跌2.9%。俄羅斯盧布近期下跌1.47%。市場追捧美元，令美匯指數升至逾一年高位，連人民幣都下滑。
土耳其危機源頭又係美國總統特朗普，佢較早前宣佈將對土耳其進口鋼鋁的關稅調高一倍，鋁關稅調整為20%，鋼鐵關稅調整為50%，土耳其里拉因此大跌，土耳其外交部表明必要時會進行報復。土耳其假假哋都係歐盟成員，市場憂慮歐洲銀行對土耳其的風險暴露，影響或蔓延至其他市場，結果連美股都受累下跌。三大指數低開後持續向下。杜瓊斯工業指數最多跌287點，其後收窄跌幅，收市跌196點或0.77%，報25313點。納斯達克指數跌52點或0.67%，至7839點，結束八連升。標準普爾500指數跌20點或0.71%，報2833點。銀行股係重災區，標普金融股指數下跌1.2%，是跌幅最大股份類別。全收杜指道指累積下跌0.6%，標普500指數跌0.3%，均結束連續五周的升勢；納指累積仍升0.3%。
睇番港股比美股更早感受到土耳其貨幣危機的味道，近日屢創上市新高的恒生銀行（011），周五股價急挫3.5%收造209元，成為表現最差的藍籌股。係資金湧入美元下，英鎊、歐羅不能倖免，歐羅應聲大跌，低見13個月低位，美市尾段報1.1412美元，仍跌0.99%，稍早時曾跌穿1.14關口，低見1.1388美元，連區內另一避險貨幣瑞士法郎也跌0.18%。主要工業國貨幣基本上只有日圓一枝獨秀，升0.18%。人仔跟隨其他貨幣走低，拖累三大內地航空股周五再插，南方航空（1055）收挫3.6%造5.3元；東方航空（670）收跌3%報4.75元；國航（753）收跌2.63%造7.03元。
特朗普砌埃爾多安攞分
港股上周風雨暫停，有在跌市撈咗貨的中環茶友周五無回吐食胡，有啲擔心慢手咗。茶友係年初開始慢慢出貨，手頭仲有子彈，佢嘅策略係只逢指數見今年低點先入市，主要係買盈富基金，貪佢跟住指數郁容易追踨，風險又比個股份散。入市目標係短炒，賺到5%就回吐，若然走唔切就當係回補咗的倉位。佢係低位撈貨，上星期彈足4日，仲差少少就去到佢定下的食胡位。佢心大心細是否應該先食為敬，皆因佢覺得呢陣晴朗有點唔尋常，擔心唔走走唔切，不過佢貨量唔多，結果等咗一等，而且外圍又起風雲，本周開市相信港股又有壓力。
茶友高位沽咗貨，而家只係等個市見到新低位先逐步回補，實際係且戰且退策略，咁即係佢對中、短期前景唔太睇好。佢解釋而家係特朗普主政下，全球股市變成民粹市。特朗普係非一般總統，係共和民主兩黨內都無乜堅實支持，所以佢要不斷搞啲民粹言論同政策來爭取選民支持。土耳其總統埃爾多安被西方選民視為獨裁者，早前世界盃德國球星厄齊爾（Mesut Ozil）因為被指表現欠佳，憤然退出國隊。厄齊爾認為佢被球迷針對，皆因佢係土耳其矞兼曾經見過埃爾多安，所以引起種族歧。從呢次事件反映西方民眾對土耳其政權的不滿。特朗普睇準機會，於是向土耳其開刀攞分。
美國向土耳其徵稅，結果由銀行體系將難題傳埋俾德國。照睇美國有可能好似同其他國家開仗咁，結果誘此資金湧入美元資產，所以新興市場以至歐洲貨幣大跌，按此估計，美股有可能都係受影響最少的市場，反而歐亞股市就仲驚。
長期抗戰防完美風暴
美元每隔幾年轉強一次，引發新興市場資金危機唔係新鮮事物，每次結果最後最後因為美資在全球投資，慢慢佢哋受到將影響帶番美國資本市場，令美股美息回落，風暴先慢慢平息。茶友話，呢次風暴可能吹得比較強，甚至不排除有完美風暴的可能性，係今次加多咗特朗普鼓吹民粹主義，令貨幣危機係經濟誘因外，額外增添咗政治色彩。民粹主義基本上係唔注重效益，嚴格嚟講同資本家唔係朋友，呢次走埋一齊，連全球第二大經濟體的中國都捲入埋，令風暴可能觸發的危機比過往大。
另一個令風暴威脅增加的原因，係美國係金融海嘯後推行超寬鬆貨幣政策，同時催生咗近10年的景氣循環。而家美國係復元中表現有力，但息口仍然處於相對低水平，未來利率仍有相當上升空間。
雖然從美國長債息率反映投資者認為高息環境難以持續，但美息向上令本來習慣咗低息的新興市場變得更加脆弱，綜合呢幾個理由，茶友唯然手頭不乏子彈，但佢依然唔心急入市，寧願等低位入貨，啱位又沽吓，有機會就盡量拉低成本，慢慢儲貨，準備長期抗戰。
特拉斯炒內地設廠 馬斯克吹水唔抹嘴
電能車商特拉斯（TESLA）的創辦人馬斯克在推特（TWEETER）聲稱考慮將公司私有化，觸發股價上升，引發監管機構注視，小股東隨時提出集體訴訟。董事局日前畫清界線，事件有點搞到一身蟻的味道。
特拉斯市值超過五百億美元，馬斯克個人財富只有百幾億美元，佢聲稱考慮將公司私有化，錢又從何來？如果純粹只是構思，沒有具體安排，這樣發佈消息，搞到股價急升，都唔好當佢無嘢。
早前美國科技股受壓，沽空機構大造淡倉，馬斯克都大感壓力，反擊話公司上市帶來季季交業績的壓力，咁對公司長遠發展唔好云云，由此可見沒有借助出口術提振股價的動機。
另一個跡象係隨著公司股價受壓，他的推文數量顯著上升，由過去每月百多條加到去四百多條，頗有「吹水唔抹嘴」之風。外界批評他想借此造成人氣支撐公司產品，結果反而帶來法律風險，有投資分析員甚至認為網上的妄言已為特拉斯股價帶來風險，認為他的律師應該停止他繼續自行推文。
無詳細交代資金何來
馬斯克近排發佈的利好消息之一，就係話會係中國市場設廠，仲話上海市政府可能會為佢提供資金，但同樣詳情欠奉。不過，中環茶友早前去睇過大陸電能車蔚來（NIO），佢哋出的電能房車每架三十多萬人仔，而且每個月包換電池或叉電，收一千多元人仔。大陸對創新科技的投入巨大，一樣可以燒錢去爭奪市場，相信電能車市場好快變成手機翻版，特拉斯有無蘋果咁叻可以做到厚利少銷照賺大錢，又係佢推文無交代的另一大疑竇。
陸羽仁
回應 (0)
我要發表