騰訊與八號仔
2018/08/20 04:13:04 網誌分類: 經濟
中美肯埋枱或利反彈
對於中美談判，美股反應正面好多，當市場傳出中美將於本月底擬重啟的副部長級貿易談判，並計劃在11月兩國元首會面前結束貿易爭議，美股首日升完周五再升，加上蘋果公司股價再創新高，三大指數齊向上。 杜斯工業平均指數一度升150點，創五個多月新高，收市升110點，報25,669點，全周累計升1.41%。納斯達克綜合指數亦尾市倒升，收市揚9點，報7,816點，全周累跌0.29%。標普500指數收市升9點，報2,850點，全周累升0.59%。
貿易摩擦有望緩和的消息傳出後，美元回軟，離岸人民幣約50分鐘內連破6.83到6.85三道關口，曾高見6.8272，較歐美時段周四（16日）的日內低位升超過450點。歐羅連續第二天上升，美匯指數跌0.5%，報96.12。
中美計劃於下周三及四在美國重啟貿易談判；同時有傳人行再出招，增加離岸市場沽空人民幣成本，人民幣匯價顯著回升。不過，美股反應好過中港股市，主要係經過上次兩國談判，傾完之後好似有成果，但突然之間又會反面，特朗普仲大力加重制裁力度。呢次談判重開，參與的官員相對低位，市場估計最多只係為高層次會談鋪路，唔預期好快會有成果。同一時間，大陸方面亦作出期望管理，強調唔會不惜一切獲取成果。
o依家傳出美國開出盤口除咗要中國撤銷關稅，推高人民幣匯價，仲要取消美企進入內地要提供技術轉移的要求，甚至長遠放棄放棄中央規劃經濟的做法，所以雖然有談判重開的消息，內地A股上周五照樣先升後倒跌急挫，上證指數單日插咗1.3%；深成指數插咗1.7% 。由此可見被特朗普玩過兩次後，雙方互合基礎已經大減，就算有好消息投資者都唔敢咁勇跟炒。政治市一向難炒，只是中美既然埋枱肯傾，始終對氣氛有紓緩作用，個市呢排插得咁急，如果有進一步利好消息，唔排除會帶動個市會再彈上啲。
估值偏高 業務無壞
係大局仍然混亂下，股王騰訊公佈近年最差業績，公佈後股價大插完出現反彈，周末中止五日跌勢，收彈333。7元，反而一齊插落嚟的手機設備股依然唔得，瑞聲（2018）低見78.15元，創逾一年半低，收挫3%造80.85元；連番急挫逾兩成的舜宇光學（2382）繼續跑輸大市，收報88.55元。
騰訊最近股價大插插，有人計過數損失市值去到4000億元以上，呢個市值差唔多等同當年電盈合併後的高峰期，所以最近佢急跌差不多重演咗二千年科網股泡沫爆破，八號仔大冧市的慘況，只不過因為佢市值超巨，香港市場深度大有進步先至頂得住。所以佢公佈業績倒退，股價下插，但仍有股民想趁低吸納，有中環茶友早前沽咗佢，o依家心大心細好無回補？想買又驚會唔會好似八號仔咁上唔番去？
好似茶友啲狀況其實相對易處理，因為佢高位沽咗，低位回補，手頭股份一樣，落袋的錢就係賺咗。高沽咗股份想回補，首要考慮係公司質素，有啲公司全靠泡沫吹大，一旦爆破唔止股價坐艇，隨時成間公司散晒，賣盤執笠。陸羽仁一直批評騰訊，都係集中佢估值太高，而唔係話佢業務唔好無前景，所以成日講好公司如果買得貴，代價都可以好大，尤其如果係炒衍生工具，咁就根本無仇報。今年騰訊就說明咗呢個道理。
如果從業務上嚟講，騰訊同當年的八號仔都一樣，在好多領域都佔有壟斷性地位，分別係八號仔壟斷的只係小小的香港市場，但估值天咁高，後來泡沫一爆，其實無影響公司生意，佢到今日依然有好多賺錢生意，只係估值變番「腳踏實地」，當年高價追貨的股民出咗太平洋，好難返到家鄉。騰訊有壟斷優勢的市場係中國，潛力龐大好多，而且不少瓣數都仲有增長潛質，同電盈主業已經非常成熟好唔同，所以估值偏高遠遠無八號仔當年咁嚴重。雖然係咁，但而家騰訊盈利全退兼估值回落，加上大市唔好，都可以觸發好強烈的跌幅，o依家佢股價由高位下挫差唔多四成，市盈率有37倍，如果想回補最好可以分段吸納。吸納方法可以係按唔同價錢分幾注買，亦可以用時間每隔一段時間買啲。
手機股計落仲係貴
比較完騰訊，不妨講埋手機設備股。雖然呢排蘋果股價強到無朋友，上周五收市再升2%，報217.58美元，創收盤歷史新高，市值近10,509億美元，但手機設備股仍然唔得，好似舜宇經過急插後，市盈率大幅下調，好似舜宇係27倍，平過騰訊的37倍。若然貨比貨，手機設備股雖然係規模上有一定優勢，技術上都有本身強處，但其壟斷性無騰訊咁強，而且業務的盈利潛力已發揮咗唔少，唔似騰訊仲有唔少空間，所以佢哋先前估值偏高仲嚴重，而家調整更加未夠，如果個市再跌，照計佢哋仲有下插空間。
冼國林鄧清河 打緊官司同團旅行
第一信用前主席冼國林（8215）近日非常「黑仔」，除了與多年相識鄧清河因為第一信用股權被斬倉對簿公堂，還因為感冒菌入眼，竟然要做切除手術。據聞，冼師傅出事前，竟然仲係同鄧清河一齊去咗韓國旅行。
冼國林為了手頭的第一信用股份被斬倉，入稟權威證券及宏安集團（1222）主席鄧清河。既然兩個人有官司打，點解會一齊去旅行呢？原來官司未曝光前，有金融界猛人相約兩人暑假齊齊坐私人飛機外遊，兩人分別應承，所以雖然後來有糾紛，大家都繼續畀面出席。
冼師傅係出發前，已經感覺不適，但依然決定成行，豈料到埗後高溫不退，他已心知不妙，決定早走，不過返港後發覺感冒菌已入侵多個器官，切除眼睛後，仲有其他後遺症要慢慢執。不過，佢打開功夫，底子夠硬，雖然經歷一刼，但做完手術後好快就通知各方友好，自己大步檻過。
感冒菌入眼
冼國林創辦第一信用，之後公司成功登陸創業板，但年前被「股壇長毛」列為互相持股的「謎網五十股」之一，股價大跌，自此之後運氣就麻麻。今次感冒變大病，好在佢性格夠硬淨，仲可以堅強面對。
陸羽仁
回應 (0)
我要發表