利豐八年跌九成的慘劇
2018/08/27 04:12:49 網誌分類: 經濟
美國聯儲局主席鮑威爾日前出席2018年Jackson Hole全球央行行長年會，期間表明適合繼續循序漸進加息，美聯儲能處理好收緊貨幣。他的說法本來唔算好特別，但市場就解讀為聯儲沒有加快加息步伐的意圖，令到美元匯價下跌，股、油、金同步上升。
儲局疑似放鴿推升金股油
鮑威爾放鴿，令美元指數下跌0.5%，報95.17，資金流向商品市場。原油期貨收漲0.89美元，升幅1.3%，扭轉之前連續多個星期的走勢。布蘭特10月原油期貨收升1.09美元，升幅1.46%，周內累升約5.6%。彈得更勁係金價，之前美元強勁，令金價疲不能興，係美元轉弱下，期金收升19.30美元，升幅1.6%，創3月份以來最大單日升幅，一舉攻破1200美元關口，收報1213.30美元，創咗最近三周收市新高，本周累升約2.5%。
同商品比較，股市表現仲強勢，標普500指數周五收升17點，升幅0.62%，報2875點，創收市紀錄新高，周內累升0.87%。杜瓊斯工業平均指數收升133點，報25790.35點，一周累升0.47%。納斯達克綜合指數收升67點，報7945.98點，周內累升1.7%。標普、納指已經創下歷史新高。
美國央行有動作，人行同時都出咗手，中國外匯交易中心周五晚上確認重啟人民幣 「逆周期因子」，令人民幣匯價飆升﹐離岸人民幣紐約市場大升881點，在岸價升750點。據中國外匯交易中心公告，人民幣對美元中間價報價，8 月以來重啟」逆周期因子」， 「以適度對沖貶值方向的順周期情緒。」預計未來「逆周期因子」會對人民幣匯率在合理水平發揮積極作用。
何謂「逆周期因子」呢？這是人行計算報價計算時考慮的因素，是根據宏觀經濟等基本面決定，用來緩和市場情緒的影響，人行計算中間價是「收盤價+一籃子貨幣滙率變化+逆周期因子」，換言之即是人行隨咗睇即時市場匯價，同時考慮內地實體經濟表現，避免匯價太過市場波動主導。人行啟動呢個調整機制，即係話覺得內地經濟現況下，人仔唔應該跌得咁急，所以係計算匯價時加入經濟因素落去。中央調整計價形式，有挾人仔淡倉，維護匯價穩定的味道，不排除亦係對應中美談判無結果，防止有人狙擊人仔。
由希望山跌下的股價最痛
中美各自出招，淡化咗談判無乜着落的影響，但美股強、中港股弱的形態未有明顯改變。新一輪業績公佈，大公司成績表有好有壞，但唔少預期高增長股，結果都交唔出功課，計有騰訊（700）、舜宇光學（2382）、瑞聲科技（2018），連一向比較穩陣的友邦保險（1299）都交唔足功課，呢個現象一方面反映咗經濟周期向上運行咗咁多年，競爭開始白熱化，生意唔容易做，同時市場對佢哋期望過高，一旦從高高的希望山跌下，感覺是很痛的。呢批公司全部都係流通量大的公司，有不少分析員追蹤，但坦白講佢哋交出肥佬業績前，似乎大行唔係咁多人覺察得到，證明除非你係大老闆肚裏面條蟲，否則好難可以準確預測生意具體表現。
多家公司交出肥佬成績表，令陸羽仁想起剛剛公佈轉盈為虧的前藍籌股利豐（494），呢隻股票係2011年1月創出25.98元的歷史高位，上周公佈轉盈為虧後股價再插5%，創出2.39元的新低價。期間利豐股價跌足90%，利豐最威水的年代時值達到2000億元，當時佢能夠膨脹咁大，除了賺錢比今日多，仲因為大家對佢前景好大信心，畀佢相對高估值，當中包括好多大行分析員，結果當係又係高高的希望山碌下來。
市場追捧增長股，但增長股係咪真係咁多呢？尤其係一啲市場競爭好競烈的環境。最近陸羽仁睇過一篇文章，話內地方便麵市場都受到網絡影響，因為而家興建外賣網，本來食開方便麵的大學生都去咗點一元一個的海南雞飯外賣，所以少咗人食方便麵。而家內地幾大巨頭鬥燒錢搶外賣市場，巨頭好似餓了麼背後係巨型科網公司阿里，為了同對手美團爭客展開激烈競爭，所以搞出了一元一客海南雞飯的大優惠。不過，以大學生的經濟能力，本來就只負擔到方便麵，現在同可見將來都食唔起海南雞飯外賣，餓了麼和其對手搶奪的又真的是潛在客戶嗎？
增長股遇瓶頸兩面縮
科技股來港上市曾吹得熱熱鬧鬧，但最近開始吹冷風，最新說法係螞蟻金服可能上市無期，原因之一係因為內地開始對網絡金融的監管要求收緊。網絡金融過去對傳統金融機構一個優勢之一，係監管成本低。而家大家去銀行買理財產品，手續之煩令人聽見怕怕，由此衍生的成本嚴重削弱利潤，特別係對中小型機構。過去網上金融機構好多都規避監管要求，若然未來要跟住做，都會增加咗營運成本。
無論利豐好，抑或其他高估值股票，當炒的時候都係靠概念變成「地球無限大」，落到現實執行起來初時可能做得好，咁股價就長升長有，但增長股一遇到瓶頸，若然無法突破，咁盈利同估值齊縮，跌起上嚟就真係唔係人咁品。
食得榴槤多 馬哈迪拆彈叻
馬來西亞高齡首相馬哈迪上星期訪華後，宣佈擱置內地兩項同中國合作的基建。雖然合作不成，但似乎北京反應相對溫和，可能係為咗一帶一路以及中美貿易戰的大局考慮。
馬哈迪未上台前，已放言反對同中國合作搞基建，所以現時項目生變唔太令人意外。現時內地同美國開仗，有說不少廠商有意把生產線搬到大馬，若然如此，大馬就成為貿戰的間接得益者。
近年，內房商不少到大馬發展，最著名是碧桂園（2007），大馬名種榴槤如貓山王，近年亦被內地消費者食到漲價。有中環茶友笑言，榴槤周身刺，食佢真係要好有技巧，馬哈迪唔知係咪食得榴槤多，所以拆炸彈都有一手。
擱置同中國合作基建
現時在香港都可以吃大馬榴槤，不同著名品種都有。茶友曾在大馬吃過有名的貓山王，但回港在九龍城見過體形更巨者。據說這是內地人到當地投資榴槤園，種出來的巨大品種。
大馬榴槤口感濃郁，層次豐富，不是其他地方可以比較，大馬人視之為驕傲。到大馬吃榴槤，專賣的街邊攤種類繁多，少說有一、二十種，非香港所能比擬。聽聞理工的教學酒店，甜品師傅來自大馬，所以最擅長做榴槤甜品，有榴槤王子的稱號，無時間到大馬，也可以預訂酒店的自助餐解饞。
陸羽仁
回應 (0)
我要發表