美國人要贏到盡的邏輯
2018/09/03 04:12:48 網誌分類: 經濟
美股8月表現可人
如果按月比較，港美股市強弱勢更加明顯。上周杜指收市微跌22點，報25964點，標普500指數由跌轉升不足1點，收市報2901點，納斯達克指數收市報8109點，上升21點。以一周計，納指累計升幅最大，升逾2%，標普500指數及道指分別升0.9%及0.7%。成個8月美股走勢可人，令其他市場投資者艷羡，杜指累升2.2%，標指升3%，兩項指數都錄得2014年以來表現最好的8月；納指更大幅攀升5.7%，是1月以來最大單月升幅，期內蘋果、亞馬遜、微軟齊創歷史新高，對納指8月份升約6%功不可沒。
呢排美國科技股持續強勢，將於本12日發佈新產品的蘋果公司創228.87美元新高，最多升1.7%，收市仍升1.1%，市值約達1.099萬億美元，股神巴菲特認為蘋果手機仲有加價空間，所以入市增持。亞馬遜再刷新收市歷史高位至2012.71美元，市值約9817億美元。傳統科技股思科表現亦佳，上周五上揚1.3%的升幅最強勁。
展望呢個星期，美國就加徵2000億美元中國貨品關稅的諮詢結束。兩國似乎未能化解矛盾，美國好有可能公佈徵稅細節。雖然美國徵稅會對中國造成直接打擊，但好快關稅衝擊就會係美國入口反映出來，屆時特朗普點樣拆彈都唔係咁易。呢個月美國會議息，一般估計利息都會上調，新興市場貨幣聞風先倒，唔排除情況會惡化，所以月頭似乎見唔到有乜利好因素，反而負面消息比較多。
美元稱霸有無都惹麻煩
新興市場第二波風暴由阿根廷吹起。阿根廷陷入衰退兩年，市場擔心該國經常帳赤字。呢個亦說明咗係美元主導世界金融體系下的矛盾，其他國家若然對美元有貿易赤字，結果就會好似巴西、阿根廷呢啲國家，隔幾年就因為缺乏美元吹起金融風暴，結果做「新興」國家幾十年都唔能夠擺脫貧窮。另一個矛盾就學似中國或日本，對美國有龐大貿易盈餘，咁樣除咗不時被美國逼升值外，o依家仲被美國話不公平，要打貿易戰。美元主導世界，但你有無美元都有麻煩，唯有美國鍾意印幾多美鈔做大花筒都得，但特朗普仲話人家搵佢笨，呢個就係美國人要贏到盡的邏輯。由於美國唔止有美元霸權，係科技、軍事都遙遙領先，所以佢點講都得，呢個就係現實，而且仲係美股長升長有之上反映出來。
美國科技股強勢，唯獨曾是風頭躉的特斯拉（Tesla）運滯，創辦人馬斯克係社媒話考慮私有化，上周證實係吹水，上周五股價收跌0.49%。電能車近年雖然開始普及，但生產商同其他新興行業豬籠入水唔同，都仲係捱主做。好似係內地電動車龍頭的比亞迪（1211），上周公佈上半年業績盈利4.79億元人民幣，按年下跌72%，每股盈利13分，不派中期息大行瑞信隨之將比亞迪目標價下調，從81.50元降至76元，較上周三收市價有53%上升空間，維持「跑贏」評級。下調目標價是因為汽車和手機業務的利潤率下滑。比亞迪股價公佈後結束反映，滑落46.65元收市。
外資大行雖然調低比亞迪評級，但目標價仍有相當水位，但呢類目標價好多時都有誤導成份，最重要反而係降低目標的方向。比亞迪在內地都有上市，內地的汽車股分析似乎仲睇得悲觀，直指最新的業績顯示，比亞迪扣除非經常性項目後虧損咗6.73億元，去年同期盈利11億元。這個現象反映了汽車行業出現增長放緩的大氣候。
電能車股投入大影響利錢
數字顯示，今年上半年內地汽車累計銷量達1406萬輛，同比增長5.6%。其中，新能源汽車佔41.2萬輛，增加111.5%。不過，汽車毛利率卻有跌了7.9%。
造成毛利率下跌原因之一是研發成本的巨額投入和財務成本。上半年比亞迪投入研發37億元，較去年同期大增34%，間接減少了近10億元的利潤。同一時間，財務費用亦出現激增。公司期間財務費用較去年同期增長了近4億元，達到了13.61億元的規模，對盈利影響變得更明顯。今年年上半年，比亞迪負債進一步提高，單是短期借款就增加了超過50億元。
普遍而言，市場最近對汽車股普遍採取觀望態度，主要係擔心內地經濟一旦放緩，汽車市場增長會更慢。比亞迪的情況而複雜啲，除了整體車市，佢仲受到本身營運的因素影響。剛公佈中期業績佢唔係咁靚仔，股價下插再向今年低位39.9元進發。今年港股係第一季勁升，但佢股價無力跟上，轉而由70元樓上回落。8月初佢見完低位後反彈，但公佈業績後開始回頭。呢排美國電能車股TESLA股價不振，對佢或者都有影響，如果做咗佢股東就要留意吓嘞。
基建通車水為財 高鐵有沒有例外？
高鐵呢個月23號開通，之前有議員擔心工程漏水，o依家情況似乎係虛驚。記得機場同會展啟用之時，都出現天花漏水，香港人話水為財，結果呢兩個項目真係賺到笑。高鐵用電，若然漏水影響行車就「濕滯」，如果係地面有水漬就應該無乜所謂。
高鐵站積極引進知名食肆
香港人一向貪新鮮，連高鐵通車前的開放日都掀起撲飛熱潮，首航的熱烈程度可想而知。據聞，除了本地新聞機構外，世界各地都有不少傳媒要求報道首航情況。高鐵站是在地底興建，與內地高鐵站高大巍峨的觀感不同，講真唔係咁多嘢睇，最大特色只是幾條線條獨特的支柱。反而港鐵o依家就積極引進啲出名食肆，香港人為食可見一斑。
高鐵站連同港鐵的圓方商場，o依家圓方四面交通唔係咁方便，將來就會多咗高鐵客源，成為直接得益者。本來，高鐵開通，港鐵多咗新業績，股價應該有得炒，但因為事前鬧出連場風波，好消息變咗壞消息，小股東確實有點無奈，唯有期望通車後口碑慢慢好番。
陸羽仁
回應 (0)
我要發表