炒新貴防接棒
2018/09/10 04:12:48 網誌分類: 經濟
儲局官員紛現身放鷹
美國對中國徵收關稅措施上周諮詢到期，總統特朗普在講話中威脅追加關稅，又暗示下矛頭指向日本，令上周五本微跌的杜瓊斯指數跌幅迅速擴大，約半小時內從接近26000點跌至25845點左右，跌超140點。同一時間，非農就業人數高於預期，加息可能性上升，也加劇美股沽壓。就業市場強勁下，聯儲局官員紛紛表態支持加息，達拉斯聯儲主席Robert Kaplan坦言，在上周五強勁的就業報告後，美聯儲應該持續加息。在未來的9-12個月，應加息至少三次，也許三到四次。克利夫蘭聯儲主席Mester表示，非農數據「強勁」表明加薪已經蔓延到各個行業和較弱的地區，應堅持逐步加息。
儲局成員係議息前放鷹，美國三大指數同時腳軟。納斯達克指數創3月份以來最大單周跌幅，收跌20.18點，報7902.54點，全周累跌2.55% ； 標普500指數收跌6.37點，報2871.68點，一周累跌1.03% ； 杜瓊斯工業平均指數收跌79點，報25916.54點，一周跌0.19%。美股上星期跌幅不大，比起其他市場繼續有較佳表現，但由於政經消息持續負面，尾段市場情緒有啲緊張，好似收市前半小時，蘋果股價急挫，一度跌超破221美元，跌幅擴大到1%以上。Tesla股價創兩年最大跌幅，收創5個月新低，債券收益率創美元債公司之最，此前傳出公司首席會計官和首席人事官將離職消息。美股高位開始有啲個別發展跡象，有策略師仲講到隨時有閃崩可能，增加咗美股高處不勝寒之感。
公司回購未必頂得住
港股經過上周再跌逾900點後，陸續有大公司加入回購行列，最矚目係騰訊（700）公告，上周五以310.8元至311.6元回購2.27萬股，涉707萬元，是公司四年來首度回購。另外，長和（001）連續多日回購集團股份，長和系係跌市中表現搶鏡，長建（1038）、長和（001）、電能（006）都逆市而升。公司回購代表管理層覺得股價合理，有資金不如投資在自己股份之上。但投資者對回購消息也不宜過份反應，最重要係睇番公司估值是否符合自己投資要求。好似騰訊用幾百萬回購，相比龐大成交比例有限，而且以公司資產、盈利及現金流，回購對提提基本因素表現好有限，以呢類流通量咁高的股份，最重要仍然係睇基金動向。
上周東亞被剔出恒指成份股，收升3.74%報29.15元；同樣被踢出藍籌的招商局港口上揚4.95%收報15.26元，為表現最佳藍籌股，頗有光榮退場的味道。新舊藍籌股將交替換馬，收市後染藍的申洲國際（2313）跌1.22%收造96.95元；同時染藍的中生製藥（1177）股價跌2.12%收報9.24元。
東亞銀行雖然出局，其實市值仍然超過800億元，規模其實唔細，只是因為港股吸納咗內地企業，不斷擴大，東亞最終無法守住藍籌地位，呢個都反映咗本地華資面對的處境。東亞過去2007年造過52元高位，過去一年高位見35.75元，o依家股價29.15元。係年初大市最旺時東亞已經提早見頂，無創出高價，因為唔係炒得咁癲，其後回落幅度都唔算太大。現價派息有近4厘，雖然失去藍籌地位，但相信有一定防守性，股價應該可以跟住大市上落。
今次染藍新貴之一的申洲，陸羽仁過去曾經介紹過佢背景。佢主要做成衣代工做出彩虹，全球不少著名品牌都係由公司生產。集團最強競爭力係為客戶做到快速交貨，基本上由幾千件到幾百萬件的定單，都可以在十五天內送到， 配合競爭激烈的成衣市場，所以雖然公司唔係營運品牌，但核心競爭力強勁，上市後股價迭創新高，終於成為恒指新貴。
申洲表現跑贏大市
上市公司成為恒指成交股唔係咁易坐穩，尤其染藍後係挑戰期。申洲o依家市值高達1457億元，上半年賺二十一億元人民幣，增長達到21%，以廠商而言非常驚人，尤其係佢主業並非高新科技，而係傳統產業。
睇番佢主要生產基地在內地，其次為越南，由於公司的生產設施非常先進，不容易快速搬遷，中美貿易戰若然惡化，對公司無可避免會構成影響。申洲今年高價係105元，染藍前回跌至96.95元，累積調整幅度10%左右，明顯係跑贏大市。目前佢市盈率達到31倍，派息率只有1.5%，似乎股價反映咗佢未來仍然會維持頗高增長，而且有啲提前佢炒作佢成為新貴的味道。
成衣生產唔係一個新興行業，主要的品牌都已經係公司客戶，要繼續取得強勁增長，必須係產品範圍有突破，喺o依家貿易環境似乎有點係逆水行舟。製造業公司過去唔係咁多染藍，有時同產品周期有關，而且唔容易長期維持優勢，所以炒染藍概念都要小心接棒。
會所列古蹟 高球會再勝一仗
土地大辯論經過幾個月落區騷，淪為得啖笑的公關活動。最近有委員更公開訴苦，抱怨傳媒話覓地小組被廢係唔公道。除了填海等建議外，外界其實都關注小組報告點講收回粉嶺高球場的選項。係呢個時候，古物諮詢委員會一致通過，粉嶺高爾夫球會會所建議評為二級歷史建築物，對高球會可說又勝一仗。
高球場本身有過百年歷史，中環茶友不少人入過去，都覺得別有味道，至於係咪要成個球場保留，當然唔同人有唔同意見，但古諮委的意見，自然係有利會方爭取。除高球會外，古諮委仲將距離球場不遠的行政長官粉嶺別墅則建議評為一級。上水古洞的行政長官粉嶺別墅方面，古諮會把別墅的主體樓、花園、守衛室等整體列為一級歷史建築物。別墅建於1934年，香港回歸前除了供港督度假之用，亦曾是中、英雙方秘密磋商設立金融管理局的會議場地。依照歷史建築物評級定義，一級歷史建築物具特別重要價值，要盡力保留。
收回粉嶺高球場阻力多
有心水清人士留意，多年前有人提議拆高球場，現今行會成員任志剛就撰文話球場附近的特首別墅有歷史價值，言下係發展呢區要三思。最近，任志剛又撰文講覓地，除咗話要用儲備填海外，似乎無乜點提收回高球場，予人感覺係建議不斷降溫。覓地小組成員中，有不少係拆場派，他們撩起了火頭，但似乎呢個建議阻力不小，咁小組點樣落台，相信又係寫報告的黃遠輝一個難題。
陸羽仁
回應 (0)
我要發表