炒內房反彈要識揀
2018/12/03 05:12:57 網誌分類: 經濟
貿戰春江鴨又多三個月玩
美國總統特朗普與中國國家主席習相遇，結果同預期差不多表示，先搞出一個「握手協議」。特朗普搞貿易戰作為中期選舉議題，外界最先估選舉完就收兵，點知過程中特朗普愈玩愈激，搞到大家愈睇愈面青。正如陸羽仁所講，若真是明年1月1日開始對大量中國貨加到25%關稅，美國產業鏈也大受影響。如今推遲加稅，積極談判如何停火，是對雙方也理性的做法。o依家徵稅暫停，未來三個月繼續傾，期間股市繼續波動，有料到之春江鴨順勢炒上炒落，就真係開心。
美股同期相對反覆，杜瓊斯工業平均指數收市報25538點；標普500指數收報2760點；納斯達克指數報7330點。一周計，杜指累漲5.1%，納指累漲5.6%，標普500指數漲4.8%；11月份，杜指漲1.7%，標普500指數漲1.8%，納指漲0.3%。
12月大市已知的主導因素有兩個，一個係中美貿易談判，另一個係聯儲局議息。對貿易問題敏感的重型機械股Caterpillar股價在「習特會」前最後一個交易日飆4%，是表現最強的杜指成份股，蘋果回吐0.5%，市值縮至8475億美元，再次落後於微軟，失去美國第一大上市公司寶座。
儲局主席鮑威爾最近對加息語氣放軟，被指為放鴿，就算呢個月儲局決定加息，外界普遍認為來年美息上調次數會減少，所以地產股上周開始發力，去到周末，帶內房股都開始反彈。係最後一個交易日，內房股明顯跑出，恒大（3333）收升8.6%報24.65元；融創（1918）收升4.4%報26元；華潤置地（1109）收升2.65%報29元；中國海外（688）收升2.63%報27.3元。碧桂園（007）收9.62元，升1.6%。
不利集中一線城市房企
今年投資市場氣氛吃緊，加上中央力壓房地產，令內房股領跌大市。陸羽仁剛同一位內房高管談起大陸樓市，他說調控整體對市道當然有影響，但有兩個特別現象可以一談。過往中央調控樓市，基本上都是一次汰弱留強的考驗，今次也不例外，各省市收緊賣樓控制，對三、四線公司資金流構成最大影響，不少公司資金鏈接近斷裂，而且銷售也有歸邊現象，幾間大公司好似恒大、碧桂園等的銷售仍然能夠增加。
另一個以往無出現的是中央集中打壓北上廣深幾個一線城市，令這幾個龍頭市場交投急跌。過去上海高峰期一年開盤交投達到6000億元人民幣，今年則縮至只有2000億元左右。
深圳的打壓力度相差無幾，所以估計深圳今次開盤數字和上海相去不遠，所以對集中經營這幾個一線市場的發展商，銷售環境相當之差，而且這個政策在可見將來都不易放鬆，他們的股價可能就會衝擊最大。按照這個說法，小型內房股和集中做大城市的內房股，就會比較吃虧。
高管說，香港投資者對內房股反應一向敏感，認為政策因素影響大，一旦風向有變就會大受打擊，所以對內房股估值不高。作為業內人，他就覺得投資者對內房價值不夠了解。
譬如內房公司賣樓，彈性其實比香港大，發展商啟動一個項目，很快就可以開盤，而且香港賣樓花套現後不能動用，要存放在銀行，內地賣樓後就可以運用資金，所以項目要投入的自有資金可以很少，這就是政策上的有利，但香港投資者往往沒有注意。
老闆企業先後入市增持
市場不看好內房股，既因為政策因素，也因為中美貿易摩擦令市場氣氛緊張。不過，外貿環境吃緊產生的副作用之一，是中央提出要加強扶持民企。內房的民企股早前向銀行借錢難，現在雖然不能說全面放水，但中央有這樣的政策，至少減少了審批人員和內房商打交道時的心理壓力。
他又說，內地的龍頭公司，很多都預售了量樓花，基本上保障了一、兩年的盈利，但股市一跌，股價不理利潤已經鎖定，一樣照跌下來。早前內房股大跌，幾間龍頭公司的大老闆或者入市增持，或者由公司啟動回購，反映他們對內房股前景有信心，就正是本地投資者和內地看法不同的地方。
毛記葵涌「慳」得有「盈」
好耐無聽過消息的毛記電視母公司毛記葵涌（1716）上星期派成績表，截至9月底止中期業績，盈利887.7萬元，按年增1.59倍，每股盈利3.29仙，不派中期息。不過小股東「腦細」再睇，盈利上升主要係慳字訣。
毛記去年收入增長了一成三，但盈利就大升1.5倍，最大理由係去年因為有上市費用支出，今年無咗呢條數，負磅即刻輕好多。生意方面，集團的數碼業務由3820萬元升到4000萬元，但賺錢就由1620萬元跌至1020萬元，即係做多咗賺少咗。呢半年見毛記再無以前「萬千呃LIKE賀台慶」的大賺項目，唯有密手多做，雖然係咁，做4000萬賺1000萬，依然相當肥仔。
至於早已變雞肋的紙媒收入由420萬跌到350萬，虧損就由130萬減到17萬元，證明真係唔做好過做，另外好似藝人管理等業務就執咗150萬。
毛記葵涌係公佈業績前股價隨市反彈，有小小炒業績味道，現時公佈賺887萬，下半年如果相同，咁市盈率約有21倍，咁同正版無記的30倍，邊個抵買真係見仁見智。
陸羽仁
回應 (0)
我要發表