覓地報告推升地產股
2019/02/25 04:12:52 網誌分類: 經濟
貿談要防特朗普攞彩
標普500指數一周累升0.62%，杜指累升0.57%，連升九周，創1995年5月以來最長連升周數；納指累升0.74%、也連升九周。港美股市累升不少，特別係美股差唔多又升番上歷史高位。有中環茶友話，呢個星期中美會喺談判「死線」前衝刺，預期會比較波動。他估計以特朗普愛出風頭嘅性格，佢唔會想喺同北韓金正恩見面時，俾其他消息搶去焦點，反而會拖住協議，等特金會威番一輪先。至於中美貿易談判就算有協議，佢都唔會畀其他人沾光，必然要搞啲「花臣」，然後親自攞埋協議個彩，增加自己嘅政治本錢，所以如果個市升得太快，就要留意特朗普會唔會反手潑一潑冷水，先行降溫等自己遲啲攞彩。
呢個星期本地焦點除咗《大灣區綱要》同《預算案》公佈外，仲有就係政府宣佈全面接納覓地小組報告。財政司司長陳茂波預告，去年第四季經濟明顯放緩，令全年增長只可達預期下限，外界估計《預算案》唔會有太多派糖措施，焦點反而係會唔會再對樓市出招。兩、三個月前，財爺曾經提過係咪要考慮幫首置人士按揭，幫佢哋上車，講法一出反對之聲甚大，呢個講法隨即沉寂，估計《預算案》都唔會有動作。
《預算案》唔會放寬按揭，但中環茶友估計都唔會再出辣招對付樓市。舊年財爺本來想喺《預算案》推出首置稅，無奈喺政府內部遇到阻力冇提出，後來樓價飆升，社會反應強烈，首置稅先匆匆推出，實際到O依家都未執行，O依家當局話接納覓地小組報告，中環茶友又點睇呢？茶友話，覓地小組唔少成員都係政府之友，喺提交報告前，好多人都話報告冇料到，小組會淪為唔受政府重視嘅「周永新2.0」，小組成員大為不滿，有人更揚言若然政府唔接受就辭職。
《預算案》難有樓市辣招
近日政府民望下跌，唔想再起波瀾，表態接納有可能係緩兵之計，因為小組所提嘅八項建議，全部都有人提過，好似話開發棕地，小組結論只係話呢啲建議比較多人支持，係「主流民意」。然而，主流民意並唔係一切，好似棕地有地主，收地點賠唔可以話有民意就得，價錢要地主滿意，否則一樣係打官司。覓地小組寫報告時講明，短期冇乜計仔增加供應，所以政府接納報告，唔代表可以好快大量增加土地。
茶友話，報告最「性感」係收回部份高球地，呢個建議就算做得成，都只係用嚟起公屋，而且數量只得幾千間。有講法話若然要起樓，就必須開路，O依家喺粉嶺一帶，最多農地嘅發展商係新地（016）同恒基（012），所以政府喺接納報告後，兩間公司股價反應正面就係咁解。
茶友又話，覓地小組覓地冇著落，都喺大地產商嘅投地意欲反映。早兩個星期嘅新界地，就畀新地奪得，而且造價相當不俗。
土地資源愈見集中
過去一年大發展商投地，新地差唔多係最勇一員。當時社會仲係擾擾攘攘，講點樣覓地，一時話收高球場，一時又話公私合營，大家都估會唔會令供應增加，但新地仍然繼續投地。O依家謎底揭盅，覓地小組話短期冇辦法明顯增加土地，咁即係手頭有地嘅發展商先有得起樓，喺呢段期間，買地多就成為贏家。過去幾年，市場嘅土地買家都係新地、恒基同會德豐（020），其他發展商買地唔多，所以今明兩年住宅供應落成雖然比較多，但未來供應好有可能更加集中喺幾個地產商手上。
機管局變身半間地產公司
論香港公職王中最識做生意嘅猛人，機管局主席蘇澤光應該係佼佼者。最近佢同傳媒春茗，就透露有唔少大計，當中已經啟動嘅航天城，就好似機場城市，將會有齊酒店、寫字樓、商場，計起嚟嘅收租樓面，肯定大過好多地產公司，有人話機管局係半間地產公司，一啲都冇誇張。
航天城首期逾200萬方呎
講起機場發展，人人都會諗起三跑，呢個項目填海面積有成600公頃，蘇澤光話為咗確保填海嘅泥沙供應，經常都會去監工。至於舊年投標嘅航天城，首期已經超過200萬方呎，由新世界（017）中標，未來仲會有其他期數推出。有地產界人士話，成個機場島本來有唔少地，O依家再填多600公頃，等如一個大地盤，真係有排食。政府嘅「明日大嶼」得個講字，機管局呢個先係「今日大嶼」。
除咗填海同航天城，機管局早前仲向政府同外面公司全面收購機場博覽館，將呢個項目納入旗下，實行大小通吃，所以機管局嘅物業資產，日後隨時稱霸全港。
有心水清人士就話，蘇澤光做過港鐵（066）主席，當時呢個位兼埋行政總裁，佢任內就有九龍站同中環站招標，當中保留咗九龍站圓方商場收租，搞到港鐵家肥屋潤，香港做地產最發，蘇澤光心知肚明，機場同港鐵一樣，都係交通運輸樞紐，有利做物業生意，咁近廚房，唔通咁都唔識搵食咩！
陸羽仁
回應 (0)
我要發表