公用暴利股的弱點
2019/06/24 04:13:06 網誌分類: 經濟
減息效應谷高油金股
減息效應溢出整個投資市場，各類資產都有迴響，應了陸羽仁所講，油股、金股逢低可吸的睇法。借住伊朗擊落美國無人機，中東局勢持續緊張，觸發油價大幅攀升，「三桶油」周末造好，中海油（883）上周五漲2.6%收報13.48元，為升幅最大藍籌股。金價升勢仲明顯，一度升穿1400美元關口，金礦股跟隨連日造好，有貨在手者不妨分段食胡。由於美國進入減息周期，對金價有利，如果手頭金股多或股票少，就不必急於一次清貨。
美股同港股一樣，出現獲利回吐，杜瓊斯指數一舉超越去年10月收市高位26828點，但收市前數分鐘出現沽壓令跌勢轉急，最終以接近全日最低收市，報26719點，微跌34點。標普500指數由上日收市紀綠高位回落，曾觸及2964點的即市新高，其後反覆倒跌，收市報2950點，下跌3點。納斯達克指數受影響，收跌0.24%，報8031點，下跌19點。總結一周表現，標普500指數累積升2.2%，杜指升2.4%，納指升3%，連升三個星期。
仲有一個星期六月份就過去，睇番至今表現，大市出現先低後高，有點提前翻身的味道。主要係美息回落趨勢日益明顯。本來，在減息周期下對息口敏感股有利，但最受歡迎公用股之一的中電（002）卻宣佈盈警回落。陸羽仁先前分析煤氣（003）股價時曾論及中電，認為公司經營環境轉趨不利。中環茶友見中電今次中期竟然轉盈為虧，都有點意外，問點解會咁？
睇番公佈，中電今次見紅，主要係澳洲電力零售業務要減值約60億至70億元。商譽減值不涉及現金項目，並不會對集團的現金流及營運造成即時影響，但將會顯著減少集團首六個月所匯報的盈利。澳洲業務要減值，皆因澳洲聯邦政府及維多利亞省政府今年7月初在當地市場制定了較目前電費水平低的受管制「安全網」零售電價，換言之；限制了集團在電費水平的提價空間和降低業務未來的收入預期，未來收入減低了，等如公司無咁值錢，於是就要減值，這個做法也是把長痛變成短痛，一刀就砍掉全部預期損失。
外出搵食難 中電要見紅
集團解釋，市場經營環境轉變將會令零售業務於2019年下半年的除稅前盈利減少2.4億港元至3億港元，並強調有關跌幅可能在未來仍會持續，但亦有可能隨著市場參與者及客戶適應新的市場情況而改變。早在今年初，澳洲能源管理局開始計劃制訂「預設電費價格」計劃，推動電費下降。當時大和資本曾發出研究報告指出，提醒投資者此舉有可能影響中電EnergyAustralia業務的零售價格，對中電今年盈利影響存在不確性，所以今年中電股價明顯跑輸煤氣。
從中電喺澳洲中招，反映出喺香港做公用事業係最好賺的暴利生意。喺澳洲發電無人會保證盈利，當地想增加用天然氣，能源風險要由經營者負擔。在香港有固定高回報，投資愈大賺得愈多，管理層主要工作係說服政府容許投資。香港要增加用清潔能源，成本要全數由消費者負責，公司不用承擔風險，在轉用過程中仲可以買新設施賺多一筆，所以香港簡直係發電公司的賺錢天堂。
香港容許電力公司穩賺，甚至享受暴利，部份小投資者，以為全世界都係咁，其實這是不美麗的誤會，單睇內地電力股就知。電力係民生工業必須，政府態度係電力公司有錢賺、能夠好好經營就得，不需要愈賺愈多，所以有機會就會推低電費，以刺激經濟改善民生，只有香港容許電力公司成為電霸，年年盈利不斷膨脹。
本地經營發電好賺，只是個餅大得愈來愈慢，有需要出外闖一闖，但一闖就知世界係唔同。未來，本港發電業務仍要因為多用天然氣而調高，電力公司經營環境一般，基金大行一早睇到，所以對中電興趣減低，只有小戶捧場，就算過去一季利息趨勢有利公用股，股價都係一般。
煤氣順風股價贏大市
同電力公司相比，競爭對手受惠電價加得快，變成順風而行，相對就輕鬆，煤氣剛剛公佈加價超過4%，雖然承諾了未來兩年不再加，但由於無額外投資，這個數字都相當和味，這個也解釋了煤氣股價能夠迭創新高，在美息向下的有利環境，此股仍有機會跑贏大市。
狗頭軍師害林鄭 「明日大嶼」隨時爛尾
政府推逃犯條例推出大頭佛，禍及其他政策，最先遭殃係國歌法同「明日大嶼」。中環茶友話，爭議性政策遇阻力死去有前科，全面接納覓地小組收回高爾夫球場已經係一例，這個建議當時得罪商界同國際輿論，但政府無理反彈強推，先失去建制支持，所以修例遇上滑鐵盧，根本完全不令人意外。
逃犯條例不是中央要求的工作，一向得西環同北京信任的法律學者陳弘毅係爆煲後撰文，話今場政治的「完美風暴」完全係不需要和可避免，弦外之音清楚不過，即係話件事同阿爺無關，香港要自己承擔責任。
修例失敗禍延民生政策，覓地小組的填海大計「明日大嶼」一提出就惹起民間反對，現屆政府肯定無力做落去，下屆政府對這個大計態度又隨時變，爛尾機會不容低估。
覓地小組報告叫停所有近岸填海，又取消所有近郊地開發，孤注一擲搞巨型填海，但同時又堅持收回高爾夫球場，惹起商界極大反感之餘，外國運動界同傳媒都有異議。茶友話，若然報告爛尾，香港土地短缺點止10年、8年解決唔到，咁就影響了下一代安居樂業，當日向特首林鄭月娥獻計大搞民粹的狗頭軍師，可以話係害主災星。
陸羽仁
回應 (0)
我要發表