阿鴻小吃 愈等愈驚

　　 心裏不斷怪自己不早點放下手頭的工作出來先吃晚飯，只不過是八點鐘，放在當眼處的一大盤南乳炆齋所餘無多，我看得眼睛也瞪大了，老闆娘好心，說為我留下一碟，待我有枱時送上；一波未平一波又起，又看到掛在廚房內的一條靚到出汁的滷水豬腩肉，切剩半條，我嘩了一聲，老闆娘好心，又為我留下。

　　 終於有枱，便一輪機關槍式落柯打，因為等位時已預先籌謀，免得臨急亂章。有南乳炆齋打底，便將留起的滷水豬腩肉拼滷水鵝片和千層豬腸加一隻滷水蛋，芥茉雞腳筋不能不叫，蔡瀾撈麵也是一絕，怎可遺漏？侍應姐姐說今天鱲魚魚飯很靚，既然魚不會吃飽人，加一條又何妨。抬頭見牆上貼出告示，今天的老火湯是粟米甘筍雪身煲豬肉湯，標明絕無味精，飲一兩碗都無所謂啦。

　　 落單不久，後面的一枱有人語帶驚訝的高聲反問：「蒜香雞都賣晒？」之後咿咿哦哦的說豬腩肉冇、齋又冇……原來還幾款熱門菜都賣清光，聽落的確得人驚。

　　 其實我在門外等時，近門口的透明廚房，在十多二十分鐘內已斬掉兩隻大滷水鵝，連豆腐也切剩幾磚，滷水蛋要急忙製作新的一批出來才夠應付，鵝雜只有一條鵝腸和一副鵝腎，相信亦時日無多；唯有肥大的墨魚，還有完完整整的一大隻掛在櫥窗內。下次找阿鴻，我會提早出發。

　　梁家權